បើតាមមន្ត្រីអ៊ីស្រាអែល គ្រាប់បាល់លីស្ទិកមួយគ្រាប់ពីយេមែន បានធ្លាក់មកលើទីក្រុងតែលអាវីវ កាលពីយប់ថ្ងៃសុក្រ ចូលថ្ងៃសៅរ៍ បណ្តាលឲ្យមនុស្ស ១៦នាក់រងរបួសស្រាល។
កងទ័ពអ៊ីស្រាអែលបាននិយាយថា បន្ទាប់ពីស៊ីរ៉ែនប្រកាសអាសន្នបានបន្លឺឡើងនៅកណ្តាលអ៊ីស្រាអែល គ្រាប់បាល់លីស្ទិកនោះបានធ្លាក់នៅទីក្រុងតែលអាវីវ បន្ទាប់ពីការព្យាយាមរារាំងដែលបរាជ័យ។
“បន្ទាប់ពីស៊ីរ៉ែនប្រកាសអាសន្នបានបន្លឺឡើងកាលពីបន្តិចនៅកណ្តាលអ៊ីស្រាអែល គ្រាប់បាល់លីស្ទិកមួយគ្រាប់ដែលបានបាញ់បង្ហោះពីយេមែនត្រូវបានកំណត់អត្តសញ្ញាណ និងមានការព្យាយាមរារាំងដែលបរាជ័យ” កងទ័ពបាននិយាយនៅលើ Telegram។
ក្រុមឧទ្ទាម Houthi ដែលគាំទ្រដោយអ៊ីរ៉ង់បានបាញ់បង្ហោះកាំជ្រួចជាច្រើនលើកពីយេមែនទៅលើអ៊ីស្រាអែលចាប់តាំងពីខែតុលា ឆ្នាំមុនមក ប៉ុន្តែហេតុការណ៍កាលពីយប់មិញគឺជាករណីកម្រមួយដែលអ៊ីស្រាអែលបរាជ័យក្នុងការរារាំង។
អ៊ីស្រាអែលបានវាយបកដោយវាយប្រហារគោលដៅជាច្រើននៅក្នុងតំបន់នានានៅក្នុងយេមែនដែលគ្រប់គ្រងដោយក្រុម Houthi។
“កាលពីបន្តិចមុន មានរបាយការណ៍អំពីអាវុធមួយបានធ្លាក់នៅក្នុងលំនៅដ្ឋានមួយនៅក្នុងស្រុកតែលអាវីវ” ប៉ូលិសអ៊ីស្រាអែលបាននិយាយកាលពីថ្ងៃសៅរ៍។
នៅថ្ងៃព្រហស្បតិ៍ កងទ័ពអ៊ីស្រាអែលបាននិយាយថា ខ្លួនបានរារាំងកាំជ្រួចមួយគ្រាប់ដែលបានបាញ់បង្ហោះពីយេមែន ដោយបំណែកគ្រាប់ផ្ទុះបានបណ្តាលឱ្យខូចខាតយ៉ាងធ្ងន់ធ្ងរដល់សាលារៀនមួយក្បែរទីក្រុងតែលអាវីវ។