យ៉ាងហោចណាស់អ្នកដំណើររថភ្លើងចំនួន ១២នាក់បានស្លាប់កាលពីថ្ងៃពុធ បន្ទាប់ពីត្រូវរថភ្លើងមួយទៀតបុកនៅលើផ្លូវរថភ្លើងជាប់គ្នា បន្ទាប់ពីពួកគេបានលោតចេញពីរទេះរថភ្លើងដោយភ័យស្លន់ស្លោដើម្បីគេចពីហេតុការណ៍អគ្គីភ័យដែលលេចឮ នេះបើយោងតាមសារព័ត៌មាន Press Trust of India បានរាយការណ៍។
យ៉ាងហោចណាស់មនុស្ស៦នាក់ទៀតបានរងរបួស ទីភ្នាក់ងារព័ត៌មាននេះបានដកស្រង់សម្តីលោក Dattatraya Karale មន្ត្រីនគរបាលម្នាក់។
គ្រោះថ្នាក់នេះបានកើតឡើងនៅរដ្ឋមហារ៉ាស្ត្រ ក្បែរស្ថានីយ៍រថភ្លើង Pardhade ចម្ងាយ ២៥៥ម៉ាយនិរតីនៃទីក្រុងមុមបៃ រាជធានីសេដ្ឋកិច្ចរបស់ឥណ្ឌា។
PTI បាននិយាយថា ជនរងគ្រោះបានលោតចេញពីរថភ្លើង Pushpak Express ដែលបានឈប់បន្ទាប់ពីអ្នកដំណើរខ្លះបានទាញខ្សែសង្គ្រោះបន្ទាន់។ អ្នកដែលបានចុះពីរថភ្លើងត្រូវបានរថភ្លើងល្បឿនលឿនមួយទៀតបុកនៅលើផ្លូវរថភ្លើងជាប់គ្នា PTI បានដកស្រង់សម្តីលោក Swapnil Nila អ្នកនាំពាក្យរថភ្លើង។
“ព័ត៌មានដំបូងរបស់យើងគឺថាមានការឆេះភ្លើងនៅខាងក្នុងរទេះមួយនៃរថភ្លើង Pushpak Express ដោយសារតែ ‘អ័ក្សក្តៅ’ ឬ ‘ការរឹតបន្តឹងហ្រ្វាំង’ (ការស្ទះ) ហើយអ្នកដំណើរខ្លះបានភ័យស្លន់ស្លោ។ ពួកគេបានទាញខ្សែ ហើយខ្លះទៀតបានលោតចុះទៅលើផ្លូវ។ ក្នុងពេលតែមួយ រថភ្លើង Karnataka Express កំពុងធ្វើដំណើរនៅលើផ្លូវជាប់គ្នា” មន្ត្រីជាន់ខ្ពស់រថភ្លើងម្នាក់បានប្រាប់ PTI។
ទោះបីជារដ្ឋាភិបាលខិតខំប្រឹងប្រែងកែលម្អសុវត្ថិភាពរថភ្លើងក៏ដោយ ក៏គ្រោះថ្នាក់នៅតែកើតមានជារៀងរាល់ឆ្នាំនៅលើផ្លូវរថភ្លើងឥណ្ឌា ដែលជាបណ្តាញរថភ្លើងធំបំផុតក្រោមការគ្រប់គ្រងតែមួយនៅលើពិភពលោក។
នៅឆ្នាំ២០២៣ រថភ្លើងអ្នកដំណើរពីរបានបុកគ្នាបន្ទាប់ពីរេចរលំនៅភាគខាងកើតឥណ្ឌា បណ្តាលឲ្យស្លាប់មនុស្សជាង ២៨០នាក់ និងរងរបួសរាប់រយនាក់ ក្នុងចំណោមគ្រោះថ្នាក់រថភ្លើងដ៏សាហាវបំផុតរបស់ប្រទេសនេះក្នុងរយៈពេលជាច្រើនទសវត្សរ៍។
កំពុងផ្តោតលើការធ្វើទំនើបកម្មបណ្តាញរថភ្លើងសម័យអាណានិគមអង់គ្លេសនៅក្នុងប្រទេសឥណ្ឌា ដែលបានក្លាយជាប្រទេសមានប្រជាជនច្រើនជាងគេបំផុតលើពិភពលោកដែលមានចំនួន ១,៤២ពាន់លាននាក់។