អ្នកនេសាទជនជាតិប៉េរូម្នាក់ត្រូវបានគេប្រទះឃើញនៅរស់រានមានជីវិតបន្ទាប់ពីចំណាយពេល ៩៥ ថ្ងៃនៅលើសមុទ្របាននិយាយថា គាត់បានស៊ីកន្លាត សត្វស្លាប និងអណ្តើកសមុទ្រដើម្បីរស់រានមានជីវិត។
លោក Maximo Napa មានសភាពខ្សោះជាតិទឹកយ៉ាងធ្ងន់ធ្ងរ និងស្ថិតក្នុងស្ថានភាពធ្ងន់ធ្ងរនៅពេលដែលគាត់ត្រូវបានល្បាតនេសាទអេក្វាឌ័ររកឃើញនៅចម្ងាយប្រហែល ៦៨០ ម៉ាយពីឆ្នេរសមុទ្រប្រទេសប៉េរូកាលពីថ្ងៃពុធសប្តាហ៍មុននេះបើយោងតាម Reuters ។ ដើមឡើយគាត់បានចាកចេញពី Marcona ដែលជាទីក្រុងមួយនៅឆ្នេរសមុទ្រភាគខាងត្បូងប្រទេសប៉េរូដើម្បីនេសាទនៅថ្ងៃទី ៧ ខែ ធ្នូ។
លោក Napa បានប្រាប់ Reuters ថា “ខ្ញុំមិនចង់ស្លាប់ទេ”។ “ខ្ញុំបានស៊ីកន្លាត សត្វស្លាប ហើយអ្វីដែលខ្ញុំស៊ីចុងក្រោយគឺអណ្តើក”។
គាត់បានបន្ថែមថា “រាល់ថ្ងៃខ្ញុំតែងតែគិតដល់ម្តាយរបស់ខ្ញុំ”។ “ខ្ញុំសូមអរគុណដល់ព្រះដែលបានផ្តល់ឱកាសទីពីរដល់ខ្ញុំ”។
ដំបូងឡើយលោក Napa បានវេចខ្ចប់អាហារគ្រប់គ្រាន់សម្រាប់ចំណាយពេលពីរសប្តាហ៍នៅសមុទ្រ ប៉ុន្តែរយៈពេល ១០ ថ្ងៃក្រោយមក គាត់ត្រូវបានព្យុះបោកបក់ចេញពីគន្លងផ្លូវ ហើយបានរសាត់អណ្តែតលើមហាសមុទ្រប៉ាស៊ីហ្វិកនេះបើតាមការរាយការណ៍របស់ Reuters ។
ទីភ្នាក់ងារព័ត៌មានបានបន្ថែមថា លោក Napa បានផឹកទឹកភ្លៀងដែលគាត់ប្រមូលបាននៅលើទូករបស់គាត់ ប៉ុន្តែនៅទីបំផុតគាត់អស់ប្រភពអាហារ ហើយបានចំណាយពេល ១៥ ថ្ងៃចុងក្រោយដោយមិនបានបរិភោគអ្វីសោះ។
យោងតាមការរាយការណ៍ថា លោក Napa បានបន្តក្តីសង្ឃឹមដោយគិតអំពីក្រុមគ្រួសារនិងចៅស្រីតូចរបស់គាត់។
យោងតាម Reuters ម្តាយរបស់គាត់ឈ្មោះ Elena Castro បានប្រាប់ទូរទស្សន៍ TV Peru ថា “ខ្ញុំបានប្រាប់ព្រះអម្ចាស់ថា មិនថាគាត់នៅរស់ឬស្លាប់ទេ សូមនាំគាត់ត្រឡប់មករកខ្ញុំវិញ ទោះបីជាគ្រាន់តែបានជួបគាត់ក៏ដោយ” ។
គាត់បានបន្ថែមថា “ប៉ុន្តែកូនស្រីរបស់ខ្ញុំមិនដែលបាត់បង់ជំនឿឡើយ។ ពួកគេតែងតែប្រាប់ខ្ញុំថា៖ ម៉ាក់ គាត់នឹងត្រឡប់មកវិញ គាត់នឹងត្រឡប់មកវិញ”។
លោក Napa បានជួបជុំជាមួយប្អូនប្រុសរបស់គាត់នៅក្នុងទីក្រុង Paita ហើយត្រូវបានគេរំពឹងថានឹងទទួលបានការពិនិត្យសុខភាព។